General Santos City – Plastado o nahan-ay na sa mga awtoridad ang gikinahanglang seguridad nga ipatuman atol unya sa 3 ka adlaw nga kasa-ulogan sa ‘SARANGANI BAY (SARBAY) FESTIVAL 2023 nga ilusad didto sa Coco Beach, Brgy. Gumasa, Sarangani Province ug sa uban pang dapit sa probinsiya diin adunay ipahigayon nga mga padula nunot sa maong kapiestahan.
Kana ang gikabutyag ni PCOL. Nicomendes Olaivar Jr., ang kasamtangang Provincial Director sa Sarangani Provincial Police Office (SPPP) atol sa gilusad nga Press Conference kagahapong adlawa sulod sa Sarangani Provincial Capitol.
Sigun ni Col. Olaivar, adunay kinatibuk-ang 664 ka security force ang ipakatag atol sa SARBAY FEST gikan Mayo 25-27, 2023.
Kini gilangkoban matud pa sa 368 ka mga pulis ug dugang pang pwersa gikan sa Philippine Army, Philippine Coast Guard, Philippine Navy ug uban pang grupo sa force multifliers.
Gipasalig sa labaw sa Sarangani PNP nga magmalinawon ang kinatibuk-ang kalihokan sa SARBAY FEST ug dili kini matugaw sa dautang mga elemento, hilabi na sa pipila ka mga rebeldeng nahabilin ug gatikaw-tikaw sa kabukiran sa lalawigan.
Maglatag matud pa ang security force og 3 ka hut-ong sa mga checkpoints padulong sa sentrong lugar diin ipahigayon ang pinakadakung BEACH FESTIVAL sa nasud karong panahona.
Daghan sab og pwersa sa mga awtoridad ang ipakatag sa mismong venue sa SARANGANI BAY FESTIVAL. (Fred Degala)