General Santos City – Misangpot sa pinusilay ang pagsilbi og Warrant of Arrest sa usa ka target sa operasyon sa kapulisan sa Sitio Lamliing, Brgy. Tuyan, Malapatan, Sarangani Province niadtong Nobyembre 29, 2024, pero misangko ra kini sa pagkasikop sa mga kaubanan sa bu-ot silbihan og warrant.
Giila ang mga dinakpan nga sila si alyas “Fando”, alyas “Raqueben”, alyas “Jenroy”, ug alyas “Ferian”, kinsa pulos anaa sa hustong edad ug mga molupyo sa nahisgutang Barangay. Samtang ang target sa operasyon giila nga si “Wanay Sangcala”.
Base sa report, mga alas 3:30 sa kaadlawon dihang gironda sa hiniusang pwersa sa CIDG12 Sarangani PFU Operatives (lead Unit), Malapatan Municipal Police Station, Provincial Mobile Force Company Sarangani Police Provincial Office ug Regional Intelligence Division 12 ang nasangpit nga lugar aron dakpon.
Ang Wanted Person nga si Wanay Sangcala pinaagi sa usa ka Warrant of Arrest alang sa kasong Murder nga walay girekomendar nga piyansa. Ug dihang nakit-an sa suspek ang mga otoridad nga nagpadulong sa ilang dapit, kalit lang kining namusil.
Gumikan niini, nakaikyas ang target sa operasyon apan nasikop ang upat niya ka kauban nga armado ug nasakmit ang lima ka unit sa shot gun nga adunay pito ka bala. Hangtud karon, alerto pa ang mga otoridad sa pagsikop sa wanted person nga nakaikyas.