General Santos City – Dili pa andam ang lokal nga panggamhanan sa dakbayan nga manakop ug mga kolurom nga mga tricycle nga naga-byahian sa syudad.
Sumala kang Atty. Dominador Lagare Jr, chairman sa komitiba sa transportasyon nga ilaha pang ginahan-ay ang ordinance franchising guidelines nga unang gipangayo sa Sangguniang Panglungsod ayha ma-release ang mga prangkisa ngadto sa mga kooperatiba ug mga indibidwal nga nag-apply.
Atol matud pa sa gihimong meeting niadtong nakalabay nga semana, adunay usa ka operator ang naghupot ug napulo ka pangrangkisa ug nihangyo nga tanan ang i-renew, apan giklaro ni Atty. Lagare nga subay sa ordinansa sa syudad, bawal kini gumikan sa matag usa ka operator, ang gitugutan lang mao ang usa ka prangkisa sa tricycle.
Dugang pamahayag ni Atty. Lagare nga anaa sa 9mil nga mga prangkisa sa tricycle ang pwedeng ihatag sa syudad, apan sa karon, naa pa lang sa 3,001 ang adunay prangkisa nga naga-dagan sa dalan ug kini nga mga prangkisa ang gihatag sa milabay pa nga administrasyon.
Higayon matud pa nga mahatag na ang tanan nga mga prangkisa, siya nagtuo nga kaya ma-cater sa 9mil nga mga tricycle ang tanan nga pasahero sa Gensan.
Pagpaklaro ni Atty. Lagare nga bisan ug wala pa nagapanakop ang city traffic, anaa matud pa ang kapulisan nga maoy nagapanakop sa mga tricycle.
Kalabot niini, gibutyag ni Atty. Lagare nga samtang ginahulat nga mapasar ang Ordinance For Franchise Guidelines nga anaa sa hawanan sa konseho, ilang ginasuta ug maayo kung kinsa ang mga angayang mahayagan ug prangkisa.
Gawas matud pa sa mga miyembro sa red, white ug apple green nga kooperatiba, adunay 140 nga mga indibidwal ang nag-apply ug prangkisa sa buhatan sa public safety office. (Fred Degala)