- Advertisement -
General Santos City – Makabaton na’g kaugalingong 2-storey building nga nagkantidad og P10 milyones ka pesos ang Traffic Enforcement Unit (TEU) ning dakbayan sa Gensan.
Kana ang gikabutyag ni Police Major Oliver Pauya- ang kasamtangang labaw sa TEU-Gensan ngadto mismo sa iyang mga tauhan kagahapon sa hapon.
Butyag ni Pauya, itukod ang kaugalingon nilang building sa kasamtangan nilang buhatan nga mapalgan sa compound sa Police Station 1 (Pendatun PNP).
Sugdan matud pa kini pagtukod sa mosunod nga mga buwan, diin ang pundo o budget niini magagikan sa lokal nga kagamhanan ning dakbayan.
Gawas sa P10 milyong 2-storey building, aduna pa’y laing P1.5 milyong Conference Room nga bulag itukod sa dakung building.
Sigun ni Pauya, kung mahinayon kini nga mga proyekto mamahimo unya niya kining kabilin nga legasiya sa serbisyo alang sa mosunod nga tagdumala sa TEU-Gensan ugaling mo-retiro na siya sa serbisyo sa umaabot nga mga katuigan. (Giovanni Pasco)
- Advertisement -
