Sarangani Province – Isip pagpangandam alang sa ultimate beach party-Sarangani Bay Festival 2024, usa ka final security meeting ang gipahigayon niadtong Mayo 17 aron masiguro ang kaluwasan ug seguridad sa maong kalihokan.
Ang maong tigom gipangunahan ni Gobernador Rogelio D. Pacquiao uban ni Provincial Tourism Council of Sarangani, Inc. (PTCSI) President Jobelle Pacquiao.
Ang diskusyon nasentro sa pagtapos sa komprehensibong plano sa seguridad alang sa tulo ka adlaw nga selebrasyon gikan sa Mayo 24 hangtod 26, nga gikatakdang mahitabo sa baybayon sa Reyes Beach, Gumasa, Glan.
Gihatagan og gibug-aton ni Gobernador Pacquiao ang kamahinungdanon sa koordinasyon ug pagpangandam sa tanang ahensya sa seguridad aron masiguro ang luwas ug makalingaw nga festival alang sa tanang manambong.
Si Sarangani Police Provincial Director Deanry Francisco naghatag ug usa ka kinatibuk-ang ideya sa mga estratehiya sa pagdeploy sa kapulisan, samtang ang mga representante sa Coast Guard ug Armed Forces naghisgot sa maritime ug on-ground nga mga lakang sa seguridad.
Ang Presidente sa PTCSI nga si Jobelle Pacquiao mipadayag og pagsalig sa mga pagpangandam sa siguridad, nga nag-ingon nga ang pagtinabangay tali sa nagkalain-laing ahensya mahinungdanon alang sa kalampusan sa festival.
Gipasalig niya nga ang tanan nga mga paningkamot gihimo aron mahatagan usa ka luwas nga palibot alang sa pagdagsa sa lokal ug internasyonal nga mga turista nga gilauman nga motambong. (Rem Agdon)