General Santos: MGA DAGKUNG KABOG NADISKOBRENG DAGSA SA 1 BUKID SA GENSAN

General Santos City – Sa padayong paningkamot sa pagpanalipod sa lokal nga wildlife ug pagpalambo sa biodiversity conservation, ang Community Environment and Natural Resources Office (CENRO) sa General Santos City nagpahigayon og bats monitoring activity niadtong Abril 10, sa Nopol Hills, Barangay Mabuhay, ning dakbayan.

Ang aktibidad gitumong sa pagsuta sa populasyon, pagkalain-lain sa mga espisye, ug kahimtang sa pinuy-anan sa mga kabog sa nasangpit nga lugar—important indicators sa usa ka himsog nga ekosistema.

Ang Dagkong Flying Fox (𝘗𝘵𝘦𝘳𝘰𝘱𝘶𝘴 𝘷𝘢𝘮𝘱𝘺𝘳𝘶𝘴), usa sa kinadak-ang espisye sa kabog sa kalibotan ug nailhang pollinator atol sa naasoy nga pag-obserbar.

Ang mga personahe gikan sa Conservation and Development Section sa CENRO GenSan, uban sa mga representante sa City ENRO, maoy mipahigayon sa maong aktibidad.

Ang dokumentasyon sa Large Flying Fox, usa ka Near Threatened species ubos sa IUCN Red List, nagpasiugda sa ekolohikal nga bili sa Nopol Hills isip puy-anan sa nahulga nga wildlife.

Ang maong inisyatiba nagsuporta usab sa pagpatuman sa Republic Act 9147 o ang Wildlife Resources Conservation and Protection Act, ug nahiuyon sa giduso sa DENR ngadto sa malungtarong pagdumala sa kinaiyahan ug pagkonserba sa biodiversity. (Rem Agdon)