Mibisita sa Probinsya sa Bohol si His Excellency David Hartman, ang Ambassador sa Canada sa Pilipinas, niadtong Huwebes, Abril 10, 2025. Usa sa iyang giadtuan mao ang Provincial Disaster Risk Reduction and Management Council (PDRRMC) Command Center aron makita mismo ang mga inisyatiba sa lokal nga pangagamhanan sa disaster preparedness ug response.
Gipadayag ni Ambassador Hartman ang iyang kadasig sa mga kalihokan sa DRRM sa Bohol ug misugyot sa posibilidad sa dugang nga kolaborasyon tali sa Canadian government ug sa Provincial DRRM Office, ilabi na sa aspeto sa urban search and rescue operations. Ang tumong niini mao ang pagpalig-on sa kapasidad sa probinsya sa pagtabang ug pagluwas sa mga biktima sa panahon sa kalamidad.
Sa iyang pagbisita, nagpirma usab og Memorandum of Agreement (MOA) si Hartman ug si Bohol Governor Aris Aumentado para sa Alinea International, ilawom sa Governance for Climate and Disaster Resilience (Gov-CDR) Project. Ang maong kasabutan naglatid sa pakigtambayayong aron mas mapaayo ang kahimtang sa disaster resilience sa Bohol.
Kauban sa Ambassador sa pagbisita mao sila Edgardo Catalan, Country Project Manager sa Alinea Philippines; John Lok, Head of Cooperation sa Global Affairs Canada (GAC); ug Isabel Hernando, Senior International Assistance Officer sa GAC. Ang ilang presensya nagpamatuod sa lig-on nga suporta sa Canada alang sa kalikupan ug kahimtang sa seguridad sa mga komunidad sa Bohol.
I via Renante Socia Lada
Renante