Usa ka trahedya ang nahitabo sa Barangay Labangon, dakbayan sa Sugbo, sa gabii sa Sabado, Abril 12, 2025, human maligsan og SUV ang usa ka 4-anyos nga batang lalaki diha sa Salvador Extension. Ang insidente misangpot sa kamatayon sa bata nga anaa lang sa daplin sa dalan atol sa maong panghitabo.
Sumala sa mga nakasaksi, ang bata nagdula-dula daplin sa kalsada sa dihang naligsan kini sa SUV nga gimaneho sa usa ka senior citizen. Matud sa driver, wala siya makabantay sa presensya sa bata ug nahibalo na lang nga naay nilagubo human sa insidente. Usa ka residente ang misugat kaniya ug mipahibalo nga adunay bata nga naligsan, hinungdan nga mibalik dayon siya sa lugar sa aksidente.
Pag-abot sa drayber sa nahitaboan, nakaplagan nga patay na ang bata. Wala na kini mabuhi pa bisan pa sa tabang sa mga residente. Ang kasakit sa nahabilin nga pamilya labi na sa inahan, klarong makita sa usa ka video nga nanggawas sa social media, diin iyang gihilakan ang lawas sa iyang anak nga gitabunan na og panapton.
Sa pagkakaron, anaa sa kustodiya sa kapulisan ang senior citizen nga drayber samtang padayon ang imbestigasyon sa kaso. Gitutukan usab sa mga otoridad ang posibilidad sa negligence ug angay nga legal nga aksyon batok sa driver.
I via Renante Socia Lada