General Santos City – Wala gyud nakalingkawas sa baba sa kamatayon ang mag-amahan human nga nabanggaan sa area sa national highway nga sakop sa Digos-Makar road partikular sa purok 8, Brgy. Katangawan, Gensan alas 12:00 pasado ang takna sa udto kagahapong adlawa, Agosto 21, 2022.
Mga biktima nailang si Anecito Amoguis, 43 anyos, minyo ug residente sa Purok 3, Barangay Olympog, GenSan ug duha ka mga menor de edad niining anak nga silang John Paul, 6 anyos ug Trixie, 5 anyos.
Ang disgrasya gikalambigitan sa Montero-SUV ang gimanehuan ni Fernando Letigio, 46-anyos, minyo, residente sa Purok Lampan, Brgy. Alegria, Alabel, Sarangani Province ug ang motorsiklo sa biktima.
Subay sa inisyal nga imbistigasyon sa Traffic Enforcement Unit (TEU), nagsunod matud pa ang motorsiklo ug ang Montero paingon sa sentrong bahin sa syudad. Pag-abot atubangan sa usa ka gasolinahan sa lugar, miliko ang motor sa gasoline station didto na kini nabanggaan sa Montero nga sakyanan.
Gumikan sa kakusog sa impact, nalagpot ang mga biktima ug nakaangkon ug grabeng mga samad sa nagkadaiyang parte sa lawas. Gilayon silang gidala sa ospital apan gideklarang patay samtang gipailawom sa medikasyon.
Ang driver sa SUV anaa na karon sa kostudiya sa TEU. Samtang ang duha ka mga sakyanan anaa na usab sa kustudiya sa maong buhatan alang sa proper disposition
Sa karon ginahuwat pa usab sa TEU ang desisyon sa pamilya sa mag-amahan kung ila bang pasakaan ug kaso ang driver sa SUV. (Alfredo Madas Jr., photo courtesy of TEU-GenSan)