Nagmalampuson ang pagbalik sa ‘face-to-face’ Mindanao Fashion Summit (MFS) ning Agosto 20, adlaw’ng Sabado, sa Centrio Ayala Mall Activity Center pinaagi sa hugot nga paningkamot sa Oro Fashion Designers Guild (OFDG).
Atol sa fashion show, gipasundayag sa katorse (14) ka miyembro sa OFDG ang nagkadaiyang design collections gamit ang mga tela gikan sa local producers sa Mindanao.
Lakip usab sa gipasigarbo sa maong kalihokan ang mga disenyo sa Designers’ Assembly nga gilangkoban sa lima (5) ka miyembro kinsa maoy ‘junior members’ sa OFDG.
Ang MFS ning tuig mitanyag sa lima sa mga mabulokong segments sama sa Mindanaoan Collection, Menswear Collection, Designers’ Assembly, LGBTQIA Show, ug Holiday Collection.
Gipadangat usab sa lokal nga kagamhanan ubos sa administrasyon ni Mayor Klarex Uy ang suporta niini pinaagi sa mensahe ni Higalaay Festival Committee Chairperson Eileen San Juan.
Kahinumduman nga sa milabay’ng duha ka tuig taliwala sa pandemya, mipadayon gihapon ang pagpahigayon sa MFS pinaagi sa online platform diin nasaksihan gihapon sa mga katawhan ang tinuig nga pasundayag sa Kagay-anon fashion designers.
Mao kini ang ika-onse nga edisyon sa maong kalihokan isip usa sa Higalaay Festival core events nga sarang gidagsa sa katawhan.
(Source: CIO-Cagayan de Oro City)