Genera Santos City: Nasakmit sa mga otoridad ang 180 ka ream sa smuggled nga sigarilyo nga nagkantidad ug P141,444 pesos sa usa ka operasyon sa Koronadal City, South Cotabato ning nakalabay’ng adlaw.
Sa report sa Koronadal City Police Station (CPS), mga alas 10:15 hangtod alas 11:00 sa buntag,mihimo og joint operation ang ilang janay kaabag ang South Cotabato Police Provincial Office ug ang Regional Intelligence Division (RID) 12, nga miresulta sa pagkasikop sa suspek nga giilang si alyas “Jun”, 33 anyos, minyo, taga Koronadal City.
Base sa imbestigasyon, nakadawat og impormasyon ang mga otoridad kalabot sa ilegal nga pagpamaligya ug pagdala sa mga smuggled nga sigarilyo.
Atol sa surveillance, nakit-an ang kolor pula nga Toyota Hilux Conquest nga nagbitbit og mga kahon sa sigarilyo gikan sa Kings Compound, Barangay General Paulino Santos paingon sa usa ka tindahan sa Purok Katipunan, Barangay Topland.
Sa pag-abot sa sakyanan sa tindahan, gipaabot sa mga operatiba nga makagawas ang drayber hinungdan nga gidiskarga dayon ang mga kahon sa sigarilyo.
Giduol siya sa mga awtoridad ug gipangita ang mga hingtungdan nga dokumento sa mga produkto, apan napakyas ang suspek sa pagprodyus og bisan unsang legal nga papeles.
Tungod niini, gidakop dayon siya ug gipahibawo sa iyang katungod sa Filipino una pa dad-on sa police station alang sa tukmang dokumentasyon ug disposisyon.
Nakuha gikan sa suspek ang 180 ka ream sa Canon Menthol Cigarettes ug ang sakyanan nga iyang gigamit. Ang mga nasakmit nga produkto ug sakyanan gi-turnover sa Bureau of Customs alang sa tukmang disposasyon.