Daghan na nga mga residente sa Alabel ug mga lagyaw ang mibisita sa mga puntod sa ilang minahal sa kinabuhi sa mga sementeryo sa lungsod aron muhalad og mga pag-ampo, bulak, magdagkot og kandila samtang ang uban magbilin og ginagmay nga mga pagkaon og ilimnon sa ibabaw sa mga pansiyon.
Ang Lokal nga Panggamhanan sa Alabel nga gidumalaan ni Municipal Mayor Vic Paul M Salarda MPA, nakigduyog sa nasud Katolikanhon sa kasaulogan sa All Saint’s Day o Adlaw sa mga Santos (Todos los Santos), samtang ugma, Nobyembre 02 ang All Soul’s Day o Adlaw sa mga kalag.
Aduna’y mga kaigsuonan natung nagabisita sa mga sementeryo sa Nobyembre 02, busa padayun ang awtoridad nga gilungkuban sa Alabel Municipal Police Station, Alabel Fire Station, Alabel Rescue Team ug Alabel Municipal Health Office, sa pagsiguro nga hapsay ug luwas ang mga mubisita sa sementeryo ug memorial park sa Alabel.
Ang Traffic Management Division usab sa Lokal nga Panggamhanan sa Alabel, maoy natahasan nga mu arrange sa mga sakyanan sa designated parking areas.
Padayon ang Lokal nga Panggamhanan sa Alabel sa pagpahinumdom nga likayan ang pagpanigarilyo sa mga pampubliko nga lugar sa Alabel, ang madakpan mahimong maka multa og kantidad nga P 2, 500.00 subay sa No Smoking in Public Places Ordinance sa Alabel. Ang Alabel, usa ka Smoke Free Municipality.
(ALABEL INFORMATION OFFICE)
