Sarangani Province – Abli si Sarangani Governor Ruel Pacquiao sa gidusong lakang sa pag-audit o pag-imbestiga sa financial records sa kagamhanang probinsiyal sa Sarangani.
“Among gidawat ang mga panawagan alang sa pag-audit ug pagrepaso, tungod kay kini nagpasiugda sa kolaborasyon sa mga ahensya sa gobyerno ug pagpalambo sa pagdumala alang sa kaayohan sa mga Sarangan,” ang pamahayag ni Gov. Pacquiao.
Sa usa ka pamahayag kagahapong adlawa, ang gobernador hugot usab nga nanghimakak sa mga pasingil ni reassigned Provincial Accountant Armando Cunanan nga adunay mga iregularidad nga nagakahitabo sa administrasyong Pacquiao, hilabi na sa pagpalit sa P500 milyong kantidad sa mga HEAVY EQUIPMENTS, ingon man sa 145 ka Honda-XRM motorcycles nga una nang naapod-apod sa kinatibuk-ang 142 ka barangay sa Sarangani Province.
Sa sayo pa, gipasanginlan ni Cunanan si Pacquiao sa giingong constructive dismissal kaniya ug nanawag sa Commission on Audit nga mohimo og audit investigation.
Pero tubag sa Gobernador, wala gitak-tak sa posisyon ug wala sab kini gibalhin, kundi temporaryo lamang kining gire-assigned sulod lamang sa 1 ka tuig sa buhatan sa STIPC- Sarangani Tourism and Invesment Promotion Center alang sa usa ka importanteng misyon o gimbuhaton.
Hangtud karong panahona, gapabilin pang Provincial Accountant si Cunanan, lakip ang iyangv sweldo ug tanang mga benepisyo niini walay nabawas o nakuha. (Rem Agdon)
Photos: GRDP