Usa ka 84-anyos nga lola ang naluwas gikan sa grabeng kadaot human kini giingong gisunog sa iyang umagad nga lalaki, pasado alas 2:00 sa hapon, Enero 5, 2025, sa Sitio Cambuntan, Barangay Bolinawan, Dakbayan sa Carcar, Sugbo.
Ang biktima nailhan nga si Lola Lolita Libonao Lico-an, residente sa maong dapit, nga padayong gitambalan sa ospital human makaangkon og paso sa nagkalain-laing parte sa iyang lawas.
Ang suspetsado mao si Ignacio Tribunalo, kapikas sa anak nga babaye sa biktima, nga karon nag-atubang og kaso human madakpan sa mga silingan samtang misulay kini og ikyas human sa maong insidente.
Matod sa inisyal nga imbestigasyon sa kapulisan, ang suspetsado kalit lang mitunga sa balay ug nangita sa iyang asawa. Giingong ang biktima ang napangutan-an, apan dihang nitubag kini nga wala siya kahibaw asa nahimutang ang iyang anak, nasuko ang suspetsado ug gibuboan kini og gasolina samtang nanglaba, unya giduslitan.
Tungod sa maong krimen, andam na ang pamilya sa biktima nga mopasaka og reklamo batok sa suspetsado. Ang Carcar City Police Office padayon nga nagproseso sa imbestigasyon ug giandam na ang mga kasong ipasaka batok kang Tribunalo. (Renante Socia Lada)