Subling nag-Top One kon nag-unang gina-adtuan sa mga turista ang probinsya sa Sarangani sa tibuok Rehiyon Dose bisan pa man sa nagpadayon nga pandemya.
Kini ang nigawas sa datus sa Department of Tourism asa nikabat sa 1.5 milyon o 1,521,877 ang tourist arrivals nga natala sa Sarangani Province atong nakalabay nga tuig 2021. Gisundan sa South Cotabato nga adunay 1,121,010 tourist arrivals. Ikatulo ang North Cotabato 395,912. Sultan Kudarat 378,869. Ug dakbayan sa Heneral Santos nga adunay 375,758 day-tourist arrivals.
Segun ni Governor Steve Chiongbian Solon kauban ang mga municipal mayor nga nahimong tourism champions ug mga kugihan nga municipal tourism officers sa pagpanguna ni Ms. LangLang Purisima sa Sarangani Tourism and Investment Promotion Center (STIPC), sa pagsuporta nila Vice Governor Elmer De Peralta, mga board member hilabi na si Board Member Dr. Ruiz sa komitiba sa turismo, bisan na nila Senador Manny ug Congressman Ruel Pacquiao ug Ma’am Michelle Lopez Solon sa Provincial Tourism Council, nga nagpabilin matud pa nga nahuptan sa Sarangani ang titulo nga top tourism destination sa Region 12 luyo sa DOH record nga nagpabilin usab ang Sarangani Province nga pinakaubos ang positibong kaso sa COVID-19 sa entiro rehiyon.
Kana tungod matud pa sa padayong grasya ug proteksyon sa Ginoo ug sa padayong pagsunod sa mga katawhan sa personal safety protocols.
Sa pikas nga bahin, ang Kapitolyo sa Sarangani ang gilantaw karon nga mupanindot pa sa mga atraksyon sa Sarangani Province gumikan napangitaan og paagi sa pamunuan ni Governor Solon kuyog sila Provincial Administrator Mariter Sayson ug Assistant Provincial Administrator Engr. Gerald Faciol nga makakita og dyutay nga pondo atong nakalabay nga tuig 2020 alang sa face-lifting ug pagpanindot sa pipila ka porsyon sa Capitol Compound.
Nabahin ang limitadong pondo sa Provincial Government sa Sarangani alang sa nagpadayon nga pandemya ug sa nagkadaiyang programa ug proyekto sa probinsya sa mga kalungsuran ug kabarangayan. Maayo na lang aduna pay nahagdaw niaging tuig para sa matawag nga beautification sa Kapitolyo human natukod kini tuig pa 1992, dungan sa maayo pud nga pagserbisyo ngadto sa gabisita nga mga kliyente.
Tuod man, naka-ani og pagdayig ang nindot na nga Capitol Lobby. Daw susama sa hotel ang Sarangani Capitol Lobby. Daghan gani ang nagpa-picture ug gina-post sa ilang mga Facebook.
Unang naka-saksi ang mga banggiitang local designer sa Sarangani maoy gi-display-han sa ilang mga nindot nga gi-desinyong senina ug kasuotan sa mga kandidata sa MunaTo Queen beauty pageant atong kasaulugan sa MunaTo Festival niaging bulan sa Nobyembre.
Samtang, daw susama sa mall na usab ang mga CR o comfort room sa main building sa Sarangani Capitol. Unang basihan sa maayong pagdumala bisan sa panimalay kanang adunay maayong paghan-ay sa CR kon kasilyas ang tigtungod, mapakita ang pagka-maabi-abihon sa mubisita, ug kana ang gisiguro usab sa pagdumala ni Governor Solon sa Kapitolyo. Daghan pang kalambuan karon sa Capitol Compound una mahuman ang termino ni Governor Solon.
(Source: PIO-Sarangani)
