GENERAL SANTOS CITY – Gikatakda nga pasakaan og kaso ang duha ka mga empleyado sa South Cotabato Provincial Capitol nga naaresto gumikan sa illegal nga droga sa gipahigayon nga buybust operation sa Philippine Drug Enforcement Agency kon PDEA 12.
Ang mga nasikop ang nailhan nga silang Abner Dela Torre, 56 anyos nga residente sa Brgy. Morales, Koronadal City, South Cotabato og Cyril Eldialde, 48 anyos nga taga San Vicente, Banga, South Cotabato.
Si Dela Torre ang usa ka regular employee nga na-assigned sa Provincial Engineer’s Office og si Eldialde ang job order worker nga na-assigned sa Sangguniang Panlalawigan Office.
Atol sa operasyon nakumpiska ang tulo ka sachet sa gituohang shabu nga anaa sa tulo ka gramos ang gimbug-aton nga may market value nga 20,400.
Lakip nga nakumpiska sa operasyon ang aluminum foils, cellphones, motorsiklo nga gigamit atol sa transaction og P 1,000 nga buy-bust money.