Impannakkel ni Gob. Matthew Marcos Manotoc ti kaadda ti napintas a panagtitimpuyog ditoy Ilocos Norte manipud kadagiti mayor ken dadduma pay nga opisyal, dagiti department head, dagiti empleado pakairamanan dagiti nadumaduma nga ahensia ti gobierno a pakaibilangan ti Phil. National Police ken kangrunaanna dagiti kakailian.
Inlawlawagna a daytoy ti kangrunaan a rason a saan a nagpangaddua a nangipila ti kandidatura iti panagpailayunna a gobernador ti probinsia nupay ammo ti amin nga idi damona ti agkandidato a para gobernador ket adda ti panagtukiadna ken inaramidna laeng gapu ti ibilangna a responsibilidadna iti pamiliana.
Mainaig daytoy, impadanonna ti napalaus a panagyamanna iti tunggal maysa kangrunaanna kadagiti department head ti gobierno probinsial.
Imbatadna nga amin a panagdur-as, balligi ken pammadayaw a nagun-od ti probinsia ti babaen ti administrasionna ket gapu iti kinagaget ken kinamanagayat dagiti department head ken dagiti mayor iti nadumaduma nga ili ken suidad ditoy probinsia.
Inbunannagna a dagitoy ti makagapo iti pannakasursuruna a nagayat iti trabahona ken saanna a kinagura ti biagna.
Impalgakna nga utang na kadagiti maseknan ti nadumaduma a panangipategna iti Ilocos Norte.
Innayonna a no saan a gapu kadagiti department head ken mayor iti probinsia ket mabalin nga awanen ti planona pay nga agpailayon iti takemna iti masungad a tawen 2022.\
Source: PGIN