Subling giklaro sa Department of Social Welfare and Development (DSWD) ang kwalipikasyon sa benepisyaryo sa education assistance.
Matud ni Loreto Cabaya, bag-ong regional director sa DSWD-12 kwalipikado sa programa mao ang ‘indigent’ o ‘in crisis’ nga estudyante. Pasabot kini ang mga personalidad nga tungod sa tumang kapobrehon dili makaya ang suportahan ang ilang kaugalingon sa pagtungha.
“Ang talagang inuuna natin yung pinakamahirap, kaya nga naghingi tayo nga certification sa baba na yun yung mga priority kasi sa dinami-dami nun hindi mo mapagbigyan lahat, kaya kung sino yung pinakamahirap yun lang,” asoy ni Cabaya.
Dugang ni Cabaya, duna sila’y gihimong ‘screening’ sa mga mahimong benepisyaryo aron masiguro nga kwalipikado sa ayuda. Giangkon sa opisyal nga kulang ang pondo sa gobyerno kung hatagan ang tanang mipila sa mga satellite ug regional offices sa DSWD.
Ilawom sa Memorandum Circular No. 2019-11, lakip sa benepisyaryo sa educational aid mao ang biktima sa displacement o abuse.
Lakip ang breadwinner; anak sa OFW; anak nga dunay ginikanang walay trabaho ug katong naa sa kriris nga dala sa human o natural calamities. Giklaro ni Cabaya nga wala’y apil sa programa ang mga benepisyo sa 4Ps. Gilaoman sa opisyal nga sa ika-upat ka higayon sa pagpatuman sa programa mas mahimong han-ay na kini. (Alfredo Madas Jr.)
