Patay ang usa ka 63 anyos nga lalake human kini gitikbas sa mga alas 7:50 sa gabii, September 7, 2022 sa Barangay Litolet, Siayan, Zamboanga del Norte.
Ang biktima nailhang si Alfredo Bale Aque, 63 anyos, minyo, mag-uuma ug residente sa Sitio Bulanao sa nahisgutang barangay.
Sa inisyal nga inbestigasyon nasayran nga samtang si Alfredo diha sulod sa tindahan nga gipanag-iyahan ni Joseph Balecer Bularon, ang suspetsado nga nailhang si Franco Bucol Padia, 29 anyos, minyo, mag-uuma ug residente gihapon sa Sitio Bulanao ang matud pa kalit nga mitungha sa nahisgutang tindahan nga nagdalag sundang ug sa walay duha-duha gitikbas sa makaduhang higayon si Alfredo ug maayong pagka-igo sa tuo ug sa walang bahin sa iyang lawas nga maoy nahimong hinungdan sa hinanali niyang kamatayon.
Ang suspetsadong si Franco Padia giaresto didto mismo sa iyang panimalay sa mga personahe sa RMFB9 gipangulohan ni PMSg. Roderick P. Mariano sa 905th MC ug pormal usab nga gi-turn over ngadto sa Siayan Municipal Police Station apil na ang sundang nga adunay gitas-on nga 22.5 cms.
Nasayran nga personal nga panagbingkil ang motibo sa gihimong pagpatay.
Sa pagkakaron ang patay’ng lawas sa biktima ang gi-turned over na sa mga pulis ngadto sa nahintungdan nga pamilya samtang ang suspetsado anaa na karon ilalom sa kustodiya sa Siayan MPS para sa tukmang disposasyon. (Rosevelt D. Mindinido)