General Santos City – Gibutyag ni Shandee Llido-Pestaño, City Administrator ning dakbayan sa GenSan nga dili tanan nga mga gipangdemolish sa merkado publiko ang gustong mubalhin sa Alunan Bagsakan.
Sumala niya nga uban sa mga napang-demolish ang gusto gihapon nga mubalik sa dalan o sa daan nilang pwesto gumikan sa dali matud pa alang sa ilahang mga kustumer samtang uban ang nibalhin ug pwesto apan anaa gihapon kilid sa dalan rason nga padayon ang ilahang hangyo nga boluntaryo nalang nga muhawa aron dili mapugos ang LGU sa pagpahawa kanila.
Pagpaklaro niya nga gikan sa DILG ang mando nga paghinlo sa mga dalan gikan sa mga illegal vendors ingon man illegal parkings.
Dugang pamahayag ni Pestaño nga igo lang silang nagatuman sa mando sa nasyunal apan wala kini nagpasabot nga ilang ginabawalan sa pagpamaligya ang mga nahisgutan.
Gani, gihatagan na ug luna sa alunan bagsakan ang mga nasangpit aron nga adunay kabutangan sa ilahang mga baligya ug ilaha na usab gisugdan ang clearing operation sa alunan bagsakan gikan sa mga naninda nga naghimo ug extension sa ilahang mga pwesto nga illegal.
Pag-angkon niya nga sa karon, aduna pa gihapon pipila nga mga displaced vendors ang gakawat-kawat ug tinda sa kilid sa dalan sa merkado publiko hilabina kung walay bantay. (John Rey Somido)