General Santos City – Nakaung-ong karon sa Committee on Environment sa House of Representatives ang House Bill No. 9270 nga giduso ni Congressman Steve Chiongbian Solon niagi pang tuig aron mahimo na nga national protected landscape ang Mt. Busa sa may Maasim, Kiamba ug Maitum kon MaKiMa.
Nag-inusara na lang nga dakong lasang sa probinsya sa Sarangani ang Mt. Busa maong dili lamang lokal nga gobyerno ang mututok kundili hilabi na dapat ang nasyonal nga panggamhanan.
Una na kining gideklara sa Sangguniang Panlalawigan sa Sarangani, pinaagi sa usa ka provincial ordinance, nga usa kini ka LCA o local conservation area aron pasiuna nga mapanalipdan.
Gitipigan kini nga bahandi sa mga taga-Sarangani Province tungod pinuy-anan ang Mt. Busa mountain range sa ‘pambansang ibon’ sa nasud nga mao ang pinasahi nga Philippine Eagle, aduna usab kini mala-pantasya nga mossy forest.
Gipuy-an ang Mt. Busa sa nagkadaiyang matang sa mga tanum ug mananap nga gikonsidera sa gobyerno sa Pilipinas nga endangered o hapit na maubos ug mga endemic, kanang naa ra sa Mt. Busa makita.
Napuno kini sa watershed rason nga bastante sa suplay sa tubig, ug bisan ga-El Niño na sa tumang kainit ang rehiyon apan ga-sige ra og ulan hilabi na sa Kiamba ug Maitum. (Rem Agdon)
News&Photo: EdBelacura