General Santos City – Gilubong pasado alas-12:00 Mayo 22, 2023 si KENNETH EGANO- ang Professional Boxer sa Malungon, Sarangani Province nga namatay pipila ka adlaw human sa iyang away ug kadaugan pinaagi sa Blow by Blow niadtong Mayo 6 sa Imus, Cavite.
Sigun sa inahan niining si Anabella Egano gilubong matud pa ang iyang anak atbang ra mismo sa ilang panimalay sa Brgy. JP Laurel. Wala na maabti sa mga sakop sa Media ang lubong sa naasoy nga Boksidor tungod imbes ala- 1:00 sa hapon ang eskedyul sa paglubong niini, mas sayo pa o pasado alas-12:00 sa udto kini aktuwal nga gilubong.
Asoy ni Mrs. Egano, sa usa ka pribadong luna nila gilubong si Kenneth. Mipalit matud pa sila’g gamay nga luna sa ilang silingan ug didto gilubong ang iyang anak, dili sa pampublikong sementeryo. Kini tungod, dili matud pa niya ma-agwanta nga sa layo ilubong ang iyang anak tungod gusto niya kining makita bisan unsang orasa, kay hangtud karon wala pa nadawat sa iyang kaugalingon ang kamatayon niini. (Noel Abelo Jr.)