Alabel, Sarangani Province – Malipayong gidawat sa pipila ka opisyal sa LGU-Alabel ang Farmer’s Information Technology Services (FITS) Center nga giturn-over ngadto kanila bag-ohay lamang gikan sa Department of Agriculture- Agricultural Training Institute – Regional Training Center 12.
Opisyal nga gidawat sa LGU-Alabel ang maong proyekto pinaagi ni Alabel Municipal Councilor Hermie C. Galzote, Vice-chairperson sa Committee on Agriculture, Fisheries and Cooperative nga maoy nirepresentar kang Alabel Municipal Mayor Vic Paul M. Salarda.
Sa maong seremonya, gipadangat ni Councilor Galzote ang dako nga pagpasalamat sa ATI-12 sa padayon nga pagsuporta sa mga lokal nga mag-uuma sa Alabel pinaagi sa malungtarong mga programa susama sa paglunsad sa FITS Center sa Office of the Municipal Agriculturist.
Kini nga FITS Centers gitukod isip one-stop service facility sa rural nga mga lugar, nga naghatag sa mga mag-uuma ug stakeholders og sayon nga access sa impormasyon ug mga teknolohiya nga may kalabutan sa agrikultura, pangisda, ug natural nga kahinguhaan.
Ang nag-unang katuyoan niini mao ang pagsumpay sa gintang sa impormasyon tali sa mga mag-uuma ug sa pinakabag-o nga mga teknolohiya ug kahinguhaan sa agrikultura.
Kini nagtumong sa pagpa-uswag sa produktibidad sa kaumahan, pagdugang sa kita sa mga mag-uuma, ug pagpalambo sa pagsagop sa mga bag-ong pamaagi sa agrikultura sulod sa lokal nga komunidad.
Ang FITS Center sa Alabel, kasamtangang nahimutang sa Office of the Municipal Agriculturist (OMAg) sulod sa municipal compound sa kanhing RIC building. Abli kini matud pa sa OMAg, Lunes hangtud Biyernes gikan alas- 8 sa buntag hangtud alas- 5 sa hapon.
Aduna usab mabaligya nga mga lokal nga produkto nga gimugna sa mga women’s association ug OFW organization sa Alabel sama sa banana chips, karlang chips, chili sauce ug uban pa.
Sa mensahe usab nila Municipal Agriculturist Giselle C. Gestupa ug Engr. Rommel De Vega, designated FITS Manager sa Office of the Municipal Agriculturist (OMAG), nagpasalamat sila sa ATI-12 sa pagtabang kanila sa paghatag ug kalidad nga serbisyo sa mga lokal nga mag-uuma sa Alabel.
Gipasalamatan usab sa OMAg ang paghatag og pinasahi nga suporta sa Lokal nga Panggamhanan sa Alabel agi’g pagprayoridad sa mga programa sa sektor sa agrikultura pinaagi sa mga gimugna nga polisiya ug mga lokal nga ordinansa pinaagi sa mga myembro sa 14th Sangguniang Bayan. (Rem C. Agdon)
(Source: MIO-Alabel)