- Advertisement -
Malapatan, Sarangani Province – Sa tumong ug tinguha nga mahimong legal ang ilang panag-uban sa pagpuyo isip magti-ayon, mikabat gayud sa 26 ka parisan sa mga tribong Blaan sa Malapatan, Sarangani Province ang dungan nga gikasal ni Mayor Salaway Sumbo Jr. ning nakalabay’ng Biernes sa hapon sulod sa Gymnasium sa maong lungsod.
Gihimo kini atol sa paghinumdom sa maong tribo sa pag-ila ug paghatag sa nasudnong gobyerno sa ilang katungod ilalum sa Republic Act (RA) No. 8371 nga mas na-ila sa tawag nga Indigenous Peoples’ Rights Act (IPRA) of 1997 nga napahimuslan na karon pag-ayo sa mga tribong Blaan ug uban pang tribo sa nasud.
Matud ni Mayor Sumbo, kini na ang ika-5 niyang paglusad og mass wedding sa mga tribong Blaan ning tuig 2023, diin ang gisundan niini gihimo atol sa kapiestahan sa Brgy. Kinam niadtong Oktubre 7, 2023 nga mikabat gayud sa 146 ka parisan sa magti-ayon ang iyang gikasal niadtong higayona.
Sa kinatibuk-an, mikabat na sa kaping 1,000 ka magti-ayong Blaan ang nakasal ni Mayor Sumbo karong tuiga ug gila-umang masundan pa kini sa mosunod nga buwan sa Desyembre.
Dugang butyag pa sa maong Alkalde nga sukad siya nahimong Mayor sa Malapatan gamugna gayud siya’g team sa pagpanguna sa Local Civil Registrar (LCR) nga mo-adto sa mga kabarangayan sa lungsod ug gipangita ang mga sakop sa tribo nga wala pa makasal, aron hatagan og libreng kasal ug wala ra sila maglisod sa pagpasabot sa kamahinundanon ug legalidad sa kaminyo-on.
Tanan matud pang gikasal nga mga tribong Blaan nakabaton gayud og “Marraige Certificate” nga usa karon sa mga gikinahanglang rekositos sa Department of Education (DepEd) sa pag-eskwela sa mga kabataan sa mga pampublikong tulunghaan. (Rey Ombana)
- Advertisement -
