Cebu City – Mas dako og nagasto sa pagkaon ang dakbayan sa Sugbo kon itandi sa uban panahon sa paghingusog sa atake sa coronavirus disease sa miaging tuig.
Si Konsehal Raymond Garcia, tsirman sa committee on budget and finance, mibutyag niini dungan sa pagpakita sa breakdown sa COVID-19 expenses gahapon.
Base sa breakdown nga iyang gipresentar sa media, si Garcia miingon nga dakong bahin sa ₱ 2.5 bilyong gasto mao ang pagpamalit og linatang pagkaon, sinakong bugas humay, pack lunch sa mga trabahante ug ubang food aid.
Ang food expenses miabot og ₱ 1.1 bilyon gikan sa Abril ngadto sa Disyembre 2020, nga naglakip sa hinabang pagkaon sa katawhan, pagkaon sa mga kawani, ug food subsidy sa mga pasyente sa isolation center.
Ang mga medical supplies sama sa test kits, equipment, beds, laboratory expenses, ug personal protective equipment, miabot og ₱ 431 milyones.
Ang hazard pay sa mga empleyado sa gobyerno, lakip sa financial assistance sa mga medical workers sa pribadong ospital, miabot og ₱ 392.6 milyon.
Matod ni Garcia, nadak-an sa gasto sa pagkaon ang siyudad tungod sa hinabang sa mga residente nga wala pagawsa panahon sa ECQ sulod sa halos upat ka buwan. (Jhon Tadlip/JTY)
(Source: Committee on Budget and Finance-Cebu City, photo courtesy of Lapu-Lapu City Public Information Office)