Cebu City – Gisunog sa mga awtoridad ang mokabat sa ₱ 153 milyones nga balor sa ginadiling droga nga nasakmit sa lainlaing operation.
Ang Philippine Drug Enforcement Agency o PDEA-7 misunog Marso 10, sa 22 ka kilong shabu, 28 ka gramo sa marijuana, ug 4,229 ka tabletas, 2,074 ka capsules, 12 ka ampules sa ubang matang sa illegal drugs lakip sa nubaine ug party drugs.
Ang naasoyng mga ginadiling substance nakompiskar sa nangaging mga operation sa PDEA-7 lakip niadtong Oktubre sa miaging tuig kanus-a nasakmit ang 21 ka kilo sa shabu atol sa ronda sa Lapu-Lapu City.
Sa pikas bahin, ang mga tabletas sa party drugs nakuha gikan sa unclaimed parcels nga gipada pinaagi sa post office sa Mandaue City.
Suma pa sa pangu sa PDEA 7, Levi Ortiz, ang destruction sa illegal drugs nga ilang gihimo sud sa pasilidad sa lokal nga Funeral Homes gahapon ang labing dako ubos sa iyang pamunoan.
Matod ni Ortiz, ilang gipakita sa publiko nga seryoso sila sa ilang kampanya batok sa illegal drugs.
Iyang giinsister nga wala sila anang tago-tago o recycling sa mga ebidensiya kay tinarong ang ilang pag-alagad. (Jhon Tadlip/JTY)
(News & photo courtesy of PDEA-7)
