Cebu City – Gipusil-patay sa wala mailhing tulisan ang usa ka guwardiya ug milayas dala ang kapin sa tunga sa milyon nga kuwarta gikan sa usa ka gasolinahan sa Brgy. Tuyan, dakbayan sa Naga gahapon sa kaadlawon.
Ang mga imbestigador sa kapolisan nagsusi pa sa video nga kuha sa security camera sa alang sa posibleng pag-ila sa naghimo sa krimen.
Nasayran gikan kang S/Sgt. Dionisio Cabotaje nga ang gipatayng security guard nailhang si Rogelio Patatag nga taga Brgy. Inayagan.
Natusak sa bala ang ulo ni Patatag hinungdan sa hinanali niyang kamatayon.
Nasuta sa pasiunang imbestigasyon nga mao na lay hiabtan ni Christian Jake Laran, cashier sa Sea-Oil gasoline station, nianang alas 6:30 sa buntag nga abli na ang kaha de yero sa buhatan ug nawala na ang
₱ 581,000 nga salapi.
Gipangita dayon ni Laran ang guwardiya nga si Patatag aron pagsusi unsay nahitabo apan iya kining nakita nga patay sulod sa pansayan.
Walay nahimo si Laran gawas sa pagdangop sa buhatan sa kapolisan sa Naga aron ipa-blotter ang nahitabo.
Midugang si Sgt. Cabotaje nga ang mga imbestigador nagtuo nga nahitabo ang tulis ug pagpanglungkab sa gasoline station  nianang ala una pasado sa kaadlawon.
Pagka karon, nagpadayon pa ang imbestigasyon sa mga awtoridad sa nahisgotang krimen.
(via Jhon Tadlip/JTY)