Cebu City- Natudlo pag-usab isip chairperson sa Regional Development Council kun RDC 7 ang world-renowned furniture designer nga si Kenneth Cobonpue.
Segun sa press release sa National Economic Development Athority kun Neda 7, gipirmahan ni Pres. Rodrigo Duterte ang appointment ni Cobonpue niadtong Pebrero 6.
Kon mahinumdoman, misalga si Cobonpue sa RDC niadtong 2016 diin iyang giduso ang promotion sa creative economy isip major driver sa kalamboan sa rehiyon.
Ubos usab sa iyang liderato ang pagka hulma sa Special Committee on Culture, Arts & Design.
Giumol usab sa RDC 7 ang Environment Committee aron makatabang pagtubag sa nagsaka nga problema sa kalikopan sa rehiyon ug ang ICT Committee aron paghimo sa ICT roadmap.
Ang mga dagkong infrastructure projects nga gipatuman ug buot pang ipatuman naglakip sa Cebu-Cordova Link Expressway, fourth Mandaue-Mactan Link Bridge uban sa Mandaue Coastal Road, New Panglao Offshore Bridge Connector, Cang-alwang Airport sa Siquijor, Cebu-Negros-Panay Power Interconnection Project ug Cebu-Bohol Power Interconnection Project, New Cebu International Container Port, ug New Bacong Airport sa Negros Oriental.