Cagayan de Oro City – Dugtong sa umaabot nga kapaskuhan, ang mga event organizers sa dakbayan sa Cagayan de Oro giawhag nga makigkoordinar sa City Hall aron masiguro nga masunod ang minimum public health standards. Nasayran nga ang City Health Office nakadawat na sa daghang mga hangyo gikan sa mga organizers sa beauty pageants, bazaar ug sales day nga mga kalihokan nga nagahangyo sa pag-abag ug pagsabot sa ilang mga katuyuan. Maoy hinungdan nga matud pa ni Acting City Health Officer Dr. Lorraine Nery, nagmugna silag team nga maoy mo-evaluate sa mga preparation alang niini aron madeterminar kon kini ba nakasunod sa minimum health protocols.
Atol sa usa ka press briefing niadtong adlawng Sabado (Nov.21), si Dr. Nery nagsugilon nga adunay composite team nga gilangkoban sa City Disaster Risk Reduction Management Department (CDRRMD), Regulatory Compliance Board (RCB) ug ang Disiplina Muna team nga nakigtagbo na sa mga event organizers aron masuta kon igo ba ang pagsunod niini sa minimum health standards.
Kon madumduman niadtong bulan sa Agosto, usa ka sales promotion activity ang gihimo sa usa ka outlet sa usa ka mall ning syudad ang gisuspenso sa City Hall gumikan sa pagdasok sa mga shoppers. Sa tuyo nga dili na masubli ang maong problema, ang tanang organizers gipadumduman nga makigkoordinar sa City Hall ug mokooperar niini diha sa pagpahigayon sa ilang mga events. Ug matud pa ni Dr. Nery sila nagpaabot sa ilang pagpasalamat ngadto sa mga nakigkoordinar sa kanila. (City Health Office)
