Cebu City – Suportado sa Cebu City, Lapu-Lapu City ug health officials sa tulo ka Probinsya sa Central Visayas ang Executive Order (EO) ni Cebu Governor Gwendolyn Garcia nga nagpagaan sa pagpauli sa overseas Filipino Workers(OFW) taliwa sa lahi nga pagtan-aw sa national officials.
Gipadayag kini atol sa tigom sa mga representante sa Department of Health (DOH) gikan sa Negros Oriental, Bohol, ug Siquijor nga gipahigayon sa Cebu City Emergency Operations Center, niadtong Miyerkules, Mayo 26, 2021.
Sa iyang bahin, miapelar si Lapu-lapu City Mayor Junard “Ahong” Chan sa national IATF o Inter-Agency Task Force nga irekonsider ang swabbing policy ni Gob. Gwendolyn Garcia sa mga ROFs o Returning Overseas Filipinos ug OFWs o Overseas Filipino Workers.
Giluwatan ni Chan ang maong pamahayag nunot sa nadawat nga info ni Garcia bahin sa posibleng pagpasakag kaso niya nila ni Presidential Spokesperson Harry Roque ug Justice Secretary Menardo Guevarra tungod sa pagsukwahi sa whole-of-nation approach sa swabbing sa ROFs ug OFWs.
Base sa baroganan sa Kapitolyo, ang mangabot nga mga ROFs ug OFWs sa airport nga lumad sa Sugbo i-swab test dayon samtang sa IATF, palabyon una ang unom ka adlaw.
Suportado ni Chan ang  policy ni Garcia ug gisagop na kini sa mga ROFs ug OFWs.
Kon negatibo ang resulta sa RT-PCR test, mahimo na silang makapauli apan kinahanglang ilang ipadayon ang kwarantina sa ilang panimay.
Samtang alang kang Konsehal Joel Garganera, deputy chief Implementer sa EOC, nga ang mga OFW gikan sa laing mga nasud kasagaran nakakumpleto na sa ilang duha ka dose sa bakuna.
Inig abot nila sa Mactan Cebu International Airport aduna pa silay i presenta nga negative result sa RT-PCR test. (Jhon Tadlip/JTY)
(News & photo courtesy of Cebu Provincial Governor)