Aksidenting nadasmagan sa motorsiklo kagahapong adlawa sa may Sitio Kinabutan, Brgy. Rizal, Surigao City sa may alas 8:45 ang takna sa gabii si Roberto Estobo Parada Jr. o sa dagnay na ‘Jun Parada’, 43 anyos, menyo, empleyado sa Provincial Government sanan Radio Announcer, residente sa Purok 5, Nueva Extension, Brgy. Taft, Surigao City.
Ang driver sa motorsiklo nga nakadasmag amo si Jay Mark Catamora Maggadon, 26 anyos, menyo, security guard sa Sapphire Security Agency, residente sa Purok 5, Brgy. Mabua, Surigao City. An ija taggamit na motorsiklo isa ka Honda XRM na may plate no. MBA 5366.
Sa imbestigasyon ni PSSG Alex Fuentes nasayran nga pauli na ang driver sa motorsiklo pasingod sa Brgy. Mabua. Apan pag abot sa lugar nga diin nahitabo ang aksidente mitabok sa dayan ang biktima nga miresulta sa pagkadasmag niini. Dugang pa sa imbestigasyon nasayran nga ubos sa impluwensiya sa ilimnong makahubog ang driver sanan wayay headlight ang motorsiklo, sa kapaspas sa jagan, nilagpot an biktima nga anaa sa 9 metros ang kalajo-on. Nabalî an tuo na bitiis ni Parada. Dali sija tagdaya sa Caraga Regional Hospital pinaagi sa Emergency Response Services.
Samaran usab an driver sa nahitabong aksidente. Sa pagkakuman an driver sanan an motor na taggamit an jaon kuman sa kustodiya sa Surigao City Police Station. (Mark James Lisondra, Ronda 21 RPN DXKS)