Davao City – Mas gipakusgan pa sa Barangay Buda, Marilog District ning dakbayan ang ilang monitoring ug pagpatrolya aron nga mahibal-an ang mga ginapahigayong panagtapok ug non-essential activity. Kini human gitudlo’ng hinungdan sa Covid-19 outbreak sa maong lugar ang sekreto’ng religious activity sa duha ka managlahing relihiyon . Gawas sa community swabbing, mas gipalapdan sa barangay ang contact tracing sa tanang close-generation contact.
Gibutyag ni Barangay Buda, Barangay Captain Delfin Galicia Jr., zero case sila sa Covid-19 sukad sa pagsugod sa pandemya apan karon, 99 gayud gilayon ang nagpositibo sa Covid-19. Ang mga nagpositibo gipang-swab human sila nahimong close contact sa usa ka 36 anyos nga babaye nga usa ka miyembro sa simbahan nga namatay gumikan sa Covid-19 niadtong Agosto 23.
Dugang ni Kapitan Galicia nga kung wala mamatay ang maong babaye dili dayon nila mahibal-an nga duna diay kini gibati. Sa monitoring sa ilang health workers ang gitubag sa mga nahisgutan mao nga ‘okay’ ra kuno sila ug nagdumili sa pag-kooperar ang pamilya niini. Matud ni Kapitan Galicia nga subay sa ilang imbestigasyon nasuta nga ang mga miyembro sa religious group nanagtapok tungod sa ilang church activities ug wala gituman ang pagsunod sa health protocols.
Lisud usab nga mamonitor sa otoridad ang panagtapok gumikan kay didto kini gihimo sa suok ug tago nga lugar ug kadaghanan sa mga myembro wala nagpa bakuna tungod wala kini gitugot sa ilang pagtuo. Giangkon usab ni Kapitan Galicia nga dako ang iyang kadismaya sa maong hitabo..
Ang Barangay Buda, usa ka highland tourist area dinhi sa Davao City nga nagpabiling Covid-19-free gikan sa pagsugod sa pandemic niadtong March 2020. Apan sugod Agosto 3, 2021, duna nay tulo ka mga residente ang natala’ng nagpositibo sa covid-19, asymptomatic ug naka-recover na. Nagduda si Kapitan Galicia nga ang carrier sa virus gikan sa downtown davao o kaha gikan sa Bukidnon.
(Source: Chairman Galicia , Brgy. Buda, Marilog Dist.)
