Gidala ang duha ka driver apil ang mga angkas niini sa Caraga Regional Hospital human nagkadasmagay ang duha ka mga motorsiklo niini kagahapong adlawa sa may alas 12:30 ang takna sa kaudtohon Marso 26, 2019 sa national highway, Brgy. Lipata dakbayan sa Surigao.
Ang mga nalambigit nga mga behikulo mao ang usa ka unit nga Honda CFT 125 nga motorsiklo, color silver ug tiom nga may temporary plate number 150104 nga naka-rehistro ug gimaneho ni Nelson Valloso Cabusao, 39 anyos, residente sa Purok-2 Brgy. Diaz, San Francisco, Surigao Del Norte ug ang iyang angkas naila nga si Jenelyn Cabusao. Ang ikaduhang behikulo mao ang usa ka unit nga motorstar explore nga motorsiklo, color itom ug pula nga may termporaryong plate no. 1501-0172169 nga gimaneho ni Alann Janier Arana, 60 anyos, residente sa Purok-7. Brgy. Sabang 3 dakbayan sa Surigao ug ang iyang angkas naila nga si Rosenda Sabandal Arana.
Basi sa imbestigasyon ni PO2 Roland Japzon, ang Honda nga motorsiklo nagdagan subay sa national highway gikan sa lungsod sa San Francisco pasingod sa city proper nga direksyon, samtang ang motorstar nga motorsiklo nagdagan sa opposite nga direksyon. Apan pag-abot sa national highway didto sa Brgy. Lipata diin nahitabo ang aksidente, mi-overtake ang driver sa motorstar, nawad-an kini ug control nga mi-resulta sa pagka-dasmag sa didto sa Hondo nga behikulo. Tungod sa kakusog sa impact, ang duha ka mga driver apil ang duha ka mga angkas niini nangatumba sa sementadong dalan ug naka-angkon ug mga bun-og ug samad sa nagkadaiyang parti sa ilang lawas nga gidala sa Caraga Regional Hospital, samtang ang duha ka mga driver nadala sa buhatan sa Surigao City Police Station.