Cebu City- Laing tulo ka ospital sa Sugbo ang gitakdang magbukas og Malasakit Center karong adlawa.
Kini ang gipahibawo sa OPAV kun Office of the Presidential Assistant for the Visayas.
Segun sa advisory sa OPAV, ilusad ang Malasakit Center sa TalisayCity District Hospital, St. Anthony Mother & Child Hospital sa Cebu City, ug Lapulapu City Hospital.
Pinaagi sa Malasakit Center, matabangan ang kabos nga mga pasyente nga maglisod sa galastohan sa tambalanan.
Ang nahisgotang sentro gipaluyohan sa nagkadaiyang ahensiya sa gobyerno sama sa Philippine Charity Sweepstakes Office (PCSO), Philippine Health Insurance Corp. (PhilHealth), Department of Social Welfare and Development (DSWD) ug Philippine Amusement and Gaming Corp. (Pagcor).
Gawas sa pundo gikan sa nahisgotang mga ahensiya, makadawat usab ang Malasakit Center og P5 milyon nga pundo matag usa aron magamit alang sa balansi sa bayranan sa indigent patient.
Midugang ang advisory sa OPAV nga ang pagbukas sa tulo ka Malasakit Center makahatag sa mga Sugboanon og dugang kapilian kon asa modangop aron pagpangayog medical ug financial assistance.
