Giangkon sa Department of Trade and Industry (DTI) nga anaa na sa panic-buying mode ang mga Sugboanon taliwa sa hulga sa coronavirus disease kun Covid 19.
Subay niini, ang bag-ong natudlo nga assistant secretary sa DTI, Asteria Caberte, mitambag sa publiko nga dili angayng mag-panic buying sanglit aduna may igong suplay sa mga produkto ang lalawigan.
Gitug-an ni Caberte nga iyang nahinagbo ang mga distributors ug suppliers diin ilang gipasalig ang igong suplay sa nag-unang mga produkto.
Hinuon, giangkon sa opisyal nga adunay ubang mol ug supermarket nga nagkuwang ang suplay sa alcohol apan hatdan ra usab kini sa mga distributors matag karon ug unya.
Alang ni Caberte, wala gyoy problema basta magkalma lang ang mga tawo sa ilang pagpamalit.
Giawhag usab niya ang mga mol ug supermarket nga ilimit lang sa tagurha ka botelya ang ibaligya nga alcohol aron dili magnihit ang suplay ug makapalit pa ang ubang konsumidor nga nagkinahanglan.