Dakpon ug i-impound ang mga motorbanca nga gikan sa gawas sa Cebu nga mosud sa kadagatan sa probinsiya ug silotan ang mga tag-iya.
Kini ang pasidaan nga gipagawas sa Philippine Coast Guard kun PCG-7 nunot sa mando sa kagamhanang probinsiyal.
Ang tigpamaba sa PCG 7, Lt. Junior Grade Erick Salcedo, mipadayag sa press briefing nga ilaha kining gipatuman subay sa order ni Gob. Gwen Garcia pag-ban sa tanang sakyanan sa dagat gikan sa ubang lalawigan tungod sa hulga sa coronavirus disease kun Covid 19.
Sumala pa ni Salcedo, magpatrolya sila ug pasidan-an o panakpon kadtong makalapas sa mando sa gobernador.
Una niini, miluwat og executive order si Gob. Garcia nga nagpugong sa pagsud sa mga pasaheroang barko gikan sa probinsiya ilabi na sa Negros ug Metro Manila sugod sa Marso 15 o sa miaging adlaw.
Samtang ang mga pasahero gikan sa ubang lalawigan dili na usab tugtang makasud sa Cebu sugod sa Mar. 18.
Hinuon, gitataw ni Salcedo nga kadtong mga barko gikan sa isla sa Camotes ug Olango walay labot sa ban.
Exempted usab sa travel ban ang mga rolling cargoes nga magdeliber og mga produkto para dili mabalda ang dis-og sa panginahanglanon sa probinsiya pero ipaubos kini sa screening.