Cagayan de Oro City – Usa ka dry run sa paglagda sa contact tracing forms alang sa mga commuters sa syudad sa Cagayan de Oro ang gitakda nga ipatuman sa Roads and Traffic Administration o RTA human gihimo ang konsultasyon niini tali sa public utility vehicle operators dinhi sa dakbayan.
Ang City Hall nakigkoordinar karon sa transport sector sa pagpaglig-on pa sa ilang contact tracing efforts pinaagi sa pagpalagda sa mga commuters sa contract tracing forms sa dili pa kini ipasakay sa jeepney o taxi. Kahibaloan nga ang mga fast food outlets ug restaurants ang nagrequire na usab karon sa pagpafill-up sa contact tracing forms sa mga diners pinaagi sa smartphone o mobile device sa konsumante o sa mano-mano nga paagi.
Si Roselle Gaite, ang acting chief sa RTA’s information division mibutyag nga ilang girequire ang mga drivers sa pagprovide sa ballpen ngadto sa mga commuters diin ila dayon kining i-disinfect tapos sa matag gamit. Ang forms nga pagfill-apan nag-apil na sa ngalan sa commuters, contact number, dapit nga gigikanan ug oras sa pagbiya.
Kon unsa man ang resulta sa himuong dry run, ang syudad mohimo gilayon sa ilang adjustments sa pagpatuman sa higpit nga contact tracing. Sumala pa usab ni City Health Officer Dr. Lorraine Nery atol sa usa ka press briefing sa City Hall. (City Information Office)
