Sugdan na sa pagmuntar sa musunod nga mga adlaw ang gipondohan sa opisina ni DPWH Secretary Mark Villar nga COVID-19 Isolation Facility sa probinsya sa Sarangani mukantidad og ₱ 55 Milyon ka pesos.
Ato lang adlaw nga Martes sa sesyon sa Sangguniang Panlalawigan, gitagaan sa mga board member sa pagpanguna ni Vice Governor Elmer De Peralta ug giduso ni Board Member Joseph Calanao, ang chairman sa SP Committee on Finance, og pagtugot si Governor Steve Chiongbian Solon nga pirmahan ang Memorandum of Agreement (MOA) tali kaniya ug ni DPWH Region 12 Regional Director Basir Ibrahim aron masugdan na ang pagpatindog sa maong pasilidad nga adunay 100-bed capacity.
Segun ni Sarangani Assistant Provincial Administrator for Operation Engineer Gerald Faciol, tukuron ang maong DPWH-funded COVID-19 Isolation Facility sa Brgy. Ladol, Alabel, Sarangani Province. Ipahimutang sa luna nga gipanag-iyahan sa Provincial Government sa Sarangani atubangan sa kanhi nga Isla Parilla Resort.
Magsilbi kini nga provincial COVID-19 isolation center sa Sarangani Province nga mudawat og mga may sintomas sa Coronavirus. Gikan sa pagsugod sa Coronavirus pandemic, nagsilbi na nga provincial isolation facility ang Sarangani Provincial Hospital. Anaa pud naka-alalay ang mga municipal ug barangay quarantine and isolation facility ug mga municipal hospital, sa pagsuporta nila Senador Manny ug Congressman Ruel Pacquiao ug tanang pito ka mayor.
40 footer container van ang pagagamiton ug kumpleto na kini sa aircon ug CR sa sulod. Gahinan og tamang area ang usa ka pasyente nga makalihok ug maka-langhap kini og preskong hangin gikan sa Sarangani Bay aron dili magmasulub-on samtang nagapa-ayo sa iyang lawas.
Una ng nagpasalamat si Governor Solon human nga aduna silay komunikasyon ni DPWH Secretary Mark Villar nga mumuntar og isolation facility ang DPWH sa Sarangani. Si Secretary Villar ang gipili ni Pangulong Rodrigo Duterte nga maoy isolation facility czar sa entiro Pilipinas.
Samtang, sa maong regular sesyon nakalabay nga Martes, giduso usab ni Board Member Calanao ang gi-endorso sa buhatan ni Governor Solon aron padayong mabatukan ang COVID-19. Tubag kini sa panawagan ni DBM Secretary Wendel Avisado nga aduna matud pay ₱ 1.5 Bilyon ka pesos dungag nga pondo ang Duterte Administration nga pwedeng magamit sa mga LGU sa tibuok Pilipinas sa padayong pagpakgang sa Coronavirus.
Pagakuhaon ang pondo sa Bayanihan 2 kon “Bayanihan to Recover as One Act nalatid sa Republic Act No. 11494: COVID-19 Financial Assistance to LGUs. Paspas mu-request ug mu-sabmit dayon og mga documentary requirement sa DBM. Apan dili kini pwede gamiton pang-cash assistance, administrative expenses ug susamang galastuhan, ug gikinahanglan musubay sa proseso sa procurement law.
Sa pagplastar nila Provincial Health Officer Doctor Arvin Alejandro pinaagi ni Mr. Allan Parreño, mukabat sa ₱ 78.2 Milyon ka pesos ang pa-pondohan sa Provincial Government sa Sarangani sa mao nga Bayanihan 2 aron padayong makaangkon og dungag mga tambal, medical equipment, hospital supplies, kagamitan, welfare goods, ug ang pagamugnaon nga molecular laboratory sa Sarangani Province.
(Public Information Office – Sarangani)