Gipasiugda sa Department of Tourism (DOT) Region 7 ang pagtaas sa kadaghan sa mga biyahe sa eroplano sa Central Visayas isip usa ka mahinungdan nga pagsaka sa ihap sa mga langyawng turista sa rehiyon.
Matod ni DOT-7 Regional Director Judy Gabato nga padayon nga misaka ang ihap sa pasahero sa Mactan-Cebu International Airport (MCIA), nga usa sa mga nag-unang hub sa lokal ug internasyonal nga biyahe.
Matod pa, sa 1,606 ka domestic flights ug 366 ka international flights matag semana sukad Pebrero 13, nagapabilin nga dali maabot ang Cebu alang sa mga biyahero gikan sa nagkalain-laing nasud.
Dugang niya, ang pagdaghan sa mga kapilian sa paglupad nakatampo sa paglambu sa turismo sa rehiyon.
Sa 2024, gilusad sa United Airlines ang direktang biyahe gikan sa Narita, Japan, paingon sa Cebu, nga mao ang unang American carrier nga milanding sa siyudad. Nakadugang kini sa pagdagsa sa internasyonal nga mga turista.
Gawas niini, mibalik usab ang Philippine Airlines (PAL) sa ruta nga Cebu-Osaka, samtang ang mga airline nga Aero K ug Air Busan nagsugod sa direktang biyahe gikan sa Korea paingon sa Bohol, nga dugang pa sa nagkadaghang airline connections sa rehiyon.
Bag-ohay lang usab nga gilusad sa Philippine Airlines ang bag-ong ruta nga Cebu-Catarman, Northern Samar, nga adunay tulo ka biyahe matag semana.
Sa dugang pagpadugok sa turismo, ang Cebu Pacific ug Philippine Airlines maglusad sa direktang biyahe paingon sa mainland Vietnam karong Mayo 2, 2025, nga naghatag ug mas daghang kapilian sa mga pasahero.
Gibutyag ni Gabato nga ang pinakadaghan nga mga bisita sa Region 7 naggikan gihapon sa Korea, Estados Unidos, Japan, ug China.
Nagkadaghan na usab ang mga turista nga naggikan sa Taiwan, Australia, Germany, United Kingdom, France, ug Canada, tungod sa mas lig-on nga marketing campaigns ug mas daghang biyahe sa eroplano.
Tungod sa lig-on nga koneksyon sa eroplano ug padayong pagpasiugda sa rehiyon isip usa ka premier nga destinasyon, gilauman nga padayon pang mosaka ang ihap sa mga langyawng turista sa Central Visayas. (Renante Socia Lada)
(Source: PIA-7)