Nadakpan sa kapulisan ang usa ka pugante nga nalakip sa Top 5 Most Wanted sa Central Visayas sa Barangay Bacong, Anda, Bohol, niadtong Marso 12, 2025, sa alas-5:20 sa hapon.
Ang suspetsado, usa ka 37-anyos nga residente sa maong lugar, gidakop tungod sa kaso nga may kalabotan sa pagpatay.
Gipahigayon sa mga operatiba sa Anda Municipal Police Station (MPS) ang maong pagdakop pinaagi sa warrant of arrest nga gi-isyu sa Regional Trial Court, 7th Judicial Region, Branch 51 sa Carmen, Bohol, niadtong Marso 10, 2025. Ang kaso nga gilatid sa Criminal Case Number 1103 naglakip sa kasong pagpatay ubos sa Artikulo 248 sa Revised Penal Code, nga walay girekomendar nga piyansa.
Gipriso karon ang suspetsado sa custodial facility sa Anda MPS samtang nagpaabot sa dugang legal nga proseso.
Gipasalamatan usab ni PBGen Maranan ang mga sakop sa Anda MPS ug Bohol Police Provincial Office tungod sa ilang paspas ug tinukma nga lihok.
Kini nga kalampusan usa ka pagpamatood sa misyon sa kapulisan sa pagpanalipod sa komunidad ug pagpalig-on sa balaod. (Renante Socia Lada)
(Source: PRO7- PIO)