Tres personas, incluwido un oficial del pulis, ya iri myentras tres otro el nohay sinti duele cuando ya man bagga-an el un vehiculo del pulisiya y truck de carga na Zamboanga Sibugay.
Si Coronel Eduard Mallo, el Zamboanga Sibugay police director, ya habla cay el incidente ya ocuri maga alas dos del ayer tarde, Martes, na camino nacional na Purok Uno, Barangay Aguinaldo, na municipio de Naga.
Si Mallo ya nombra con el maga victima como canda Tiniente Rodolfo Pataueg, el oficial-en-cargao del pulisiya na municipio de Alicia, Zamboanga Sibugay; Mobar Monces, y si Jikjik Boquiti, ambos maga pasajeros del truck de carga.
Asegun con Mallo cay base na investigacion el dos vehiculo ta navega na direccion opuesta (opposite direction) cuando derepente el truck ya bira o ya man U-turn myentras na abajada porcion sila del camino que ya resulta na bangga-an.
Con el truck ta maneja si Mario Lantaca, treynta tres años, y pasajeros de suyu canda Monces y Boquiti myentras con el jeep del pulis ta maneja si Police Corporal Raffer Dela Cerna con dos pasajeros Tambien como si police Patrolman Elizar Sanguan y si Pataueg.
Si Lantaca, Dela Cerna y Sanguan nohay sinti duele o iri durante el accidente.
Canda Pataueg, Monces y Boquiti ya lleva para na hospital para el curada medical. (B. Garcia)