Cebu City – Walay nakitang problema ang Department of Health o DOH-7 sa pagtugot sa pagpahigayon sa Misa de Gallo sugod karong Disyembre 16.
Hinuon, giawhag sa mga health officials ang mga LGUs nga limitahan lang ang gidaghanon sa manimbahay.
Base sa iyang mensahe nga giteks sa media, si Dr. Mary Jean Loreche, tigpamaba sa DOH-7, miingon nga ilang girekomendar ang hugot ng implementasyon sa health protocols panahon sa misa sa kaadlawon.
Ang mga lagda nga buot ipatuman sa ahensiya mao ang paglimit sa manambong matag misa, pagpasul-obog face mask ug face shields, ug pagtamod sa physical distancing.
Matod ni Loreche, nagtuo sila nga ang maong tradisyonal nga kalihokan sa simbahan mahimong mapahigayon basta magtuman lang ang tanan sa minimum health standards.
Midugang si Loreche nga ang hukom sa Malakanyang paghatag og katungod sa mga LGUs pagtugot o dili sa Misa de Gallo sa ilang tagsatagsa ka hurisdiksyon taliwa sa hulga sa coronavirus disease gihimo aron makita ang kapasidad niini pagpatuman sa minimum health standards. (Jhon Tadlip/JTY, photo courtesy by Axil Sarpamones)
(Source: DOH 7)