Aron masiguro ang kahandam, disiplina ug pagsunod sa mga sumbanan sa serbisyo sa kapulisan, gihimo sa Zamboanga del Norte Provincial Internal Affairs Service (ZNPIAS) ang 2nd Semester 2026 Proactive Inspection sa Polanco Municipal Police Station, Poblacion North, Polanco, Zamboanga del Norte.
Gipangulohan ni PLTCOL Wilson Yap Bantayanon, Acting Provincial Superintendent sa ZNPIAS, ang maong inspeksyon nga nagtutok sa pagsunod sa operational, administrative ug personnel management standards sa police station.
Lakip sa gisusi ang mga GO Bags, pagsunod sa hustong uniporme o “Tamang Bihis,” ug kahimtang ug pagkaandam sa nagkalain-laing operational equipment nga gikinahanglan sa pagpatuman sa mga buluhaton sa kapulisan.
Gipasiugda usab atol sa inspeksyon ang importansya sa accountability, transparency ug disiplina, lakip ang higpit nga pagsunod sa mga polisiya, lagda ug regulasyon sa Philippine National Police (PNP).
Pinaagi sa proactive inspection, gitutokan sa ZNPIAS ang pag-ila ug pagresolba sa mga kinahanglan pang mapaayo sa operasyon sa police station aron mapadayon ang kahandam ug kaepektibo sa mga personnel sa pagtubag sa panginahanglan sa komunidad.
Gipahinumdoman usab ang mga police personnel sa importansya sa propesyonalismo ug integridad sa responsableng pagtuman sa ilang mga katungdanan isip mga tigpanalipod ug tigserbisyo sa publiko.
Kini nga kalihokan kabahin sa padayon nga paningkamot sa ZNPIAS sa pagpalig-on sa internal discipline, accountability ug operational preparedness sulod sa kapulisan.(IKEN B. GULLEM)
Source: PNP Polanco Municipal Police Station ZNPPO