Pormal nang gisugdan kagahapon sa Dipolog City ang “Kalasag-Zamboanga del Norte” Inter-Agency Territorial Defense Operations Exercise 02-2026 ug Reserve Force Joint Training Exercise 2026, nga nagtigom sa mga ahensya sa gobyerno, military personnel, reservists ug mga partner nga organisasyon alang sa hiniusang pagbansay ug koordinasyon.
Gipahigayon ang Joint Opening Ceremony ug flag-raising activity sa Museo Dipolog Grounds nga gipangulohan sa 97th Infantry “Kalasaglahi” Battalion sa Philippine Army, uban sa City Government of Dipolog ug Provincial Government of Zamboanga del Norte. Mitambong niini sila City Vice Mayor Senen O. Angeles, Governor Darel Dexter T. Uy, LTC Jessie G. Bergonia, ug ubang opisyal sa gobyerno ug partner agencies.
Human sa opening ceremony, gipahigayon usab ang Final Coordination Meeting kung asa gi demonstrar ang mga pagahimuon nga pagbansay pinaagi sa Tactical terrain model. Ang mga mapa nga gilangkuban sa mga kasikbit nga mga barangay sa Dipolog, lakip ang unsaon pag depensa sa atung katungod kung adunay mga kalaban ang mosulong, ug pagbutyag sa mga lakang unsaon mamahimong malampuson ang maong simulation, maoy nahimong sentro sa maong panagtagbo kagahapon.
Matud pa ni Colonel Jo-ar A. Herrera MNSA (INF) PA, Division Inspector General, 1st Infantry Division, tumong sa maong programa ang paghiusa sa mga ahensya sa gobyerno sa pagpalig-on sa public safety og peace and order. Ang hulga matud pa gapadayun pero pinaagi sa pagtinabangay, kaya kining ma solusyonan.
“Threats kasi nag e-evolve so through inter agency collaborations, we address those problems, ” sigon pa ni Colonel Herrera atol sa Press Conference kagahapon.
Sa laing bahin, gibutyag usab nga ang Communication og limited resources maoy gi-atubang nga hagit sa maong aktibidad sama sa miaging joint operation.
Pinaagi sa hiniusang pagbansay ug koordinasyon, gidisenyo ang kalihukan nga mas mapalig-on ang operational capabilities ug kaandam sa mga partisipante sa pag-atubang sa mga sitwasyon nga nagkinahanglan og hiniusang aksyon tali sa nagkalain-laing ahensya ug sektor.(JENIFFER JR. DELICA)