Gihimo’g lakang padulong sa bag-ong pagsugod ang edukasyon alang sa 34 ka Persons Deprived of Liberty (PDL) nga nakatapos sa Alternative Learning System (ALS) sa Dipolog City Jail.
Malampusong nakagradwar ang mga PDL learners atol sa ika-17 Graduation and Moving Up Ceremonies nga gipahigayon niadtong Agosto 10, 2026 sa Bureau of Jail Management and Penology (BJMP) Male Dormitory, Dipolog City Jail.
Gikan sa 34 ka graduates, 13 ang nakakompleto sa Elementary level samtang 21 ang nakatapos sa Junior High School level.
Gipangunahan sa Department of Education (DepEd) Alternative Learning System ang seremonya sa pakigtambayayong sa BJMP Dipolog Male Dormitory ug City Government of Dipolog.
Mitambong sa kalihokan si City District Jail Warden JCINSP Jonathan N. Arawangsa, City Vice Mayor Senen O. Angeles isip representante ni City Mayor Roberto Y. Uy, DepEd Dipolog City Schools Division Superintendent Dr. Ma. Liza R. Tabilon, Assistant Schools Division Superintendent Dr. Rosali B. Conturno Jr., CID OIC-Chief Dr. Edgardo S. Cabalida, PSDS/ALS Focal Person Ms. Jovencia Muit-Samante ug Education Program Specialist II–ALS Ms. Jessica M. Behilda.
Sa ilang mga mensahe, gipasiugda sa mga opisyal ang edukasyon isip importante nga bahin sa rehabilitasyon ug personal nga pag-uswag sa mga PDL, ilabina sa pag-andam kanila alang sa ilang umaabot nga pagbalik sa komunidad.
Gipakita usab sa kalihokan nga ang kahimtang sa usa ka tawo dili kinahanglan mahimong babag sa pagpadayon sa pagkat-on. Pinaagi sa ALS, gihatagan ang mga PDL og higayon nga makompleto ang ilang edukasyon ug makadugang sa ilang kahibalo ug kahanas.
Ang maong graduation dili lamang nagsimbolo sa pagkakompleto sa usa ka lebel sa edukasyon, kundili usa usab ka lakang padulong sa rehabilitasyon, pagbag-o ug mas positibong kaugmaon alang sa mga nakagradwar.(IKEN B. GULLEM)
Source: Dipolog City Government