Mokabat sa 16 ka bata nga adunay nagkadaiyang balatian ang natabangan sa Zamboanga del Norte Medical Center (ZNMC) pinaagi sa libreng pediatric check-up ug surgical services nga gipahigayon bag-ohay lang.
Sa maong medical mission, walo ka bata ang nahatagan og check-up, lima ang gi-evaluate alang sa posibleng operasyon, samtang tulo ang gi-refer ngadto sa Cebu alang sa mas advanced nga pagtambal.
Tulo usab ka operasyon ang malampusong nahimo sa maong adlaw, lakip ang pagtangtang sa abdominal mass ug duha ka kaso sa hernia, nga nakatabang sa pagpaayo sa kahimtang sa mga pasyente.
Gipangunahan ang kalihokan sa mga espesyalista nga sila Dr. Noel Astrologo, pediatric surgeon, ug Dr. Marloune Amboang, pediatric anesthesiologist, uban sa medical team sa ospital.
Sumala sa ZNMC, tumong sa programa ang paghatag og sayong diagnosis ug tukmang pagtambal sa mga bata, ilabi na kadtong gikan sa mga kabus ug layo nga komunidad.
Gisuportahan usab kini sa provincial government ubos ni Governor Darel Uy isip kabahin sa padayong pagpalapad sa access sa serbisyong panglawas sa probinsya.(IKEN B. GULLEM)
SOURCE: ZAMBOANGA DEL NORTE PROVINCIAL NEWS NETWORK