Nagpahigayon og “Salamat, Kapatid” Program ang Zamboanga del Norte Police Provincial Office o ZNPPO aron pasidunggan ang retiradong personahe nga sila PEMS Pepito E. Palabrica ug PSSg Richard A. Rosete tungod sa ilang taas nga mga tuig sa matinud-anon ug dedikadong serbisyo sa Philippine National Police.
Sa iyang mensahe, gidayeg ni Provincial Director PCOL Jimmy M. Laguyo ang duha ka retirado sa ilang gipakita nga propesyonalismo, integridad, ug pag-alagad sa komunidad, nga matud niya mipabiling matinud-anon sa mga core values sa PNP bisan pa sa mga hagit sa ilang katungdanan. Gipasalamatan usab niya ang mga pamilya sa mga retirado sa ilang padayon nga pagsuporta ug pagsabot nga dako og bahin sa kalampusan sa ilang serbisyo.
Samtang mosulod na sa bag-ong yugto sa kinabuhi sila PEMS Palabrica ug PSSg Rosete, gipahayag sa ZNPPO ang ilang tibuok pagpasalamat ug pagtahod, ug nanghinaut og maayong panglawas, pahulay, ug mas daghang higayon uban ang ilang mga hinigugma, samtang magpabiling inspirasyon ang ilang kabilin sa umaabot nga henerasyon sa mga pulis.(JENIFFER JR. DELJCA)
Photo Courtesy: Zamboanga del Norte Police Provincial Office