Gibungkag sa Provincial Environment Management Office sa Zamboanga del Norte o PEMO-ZN ang usa ka illegal gold mining activity sa Sitio Canatuan, Barangay Tabayo, Siocon, isip kabahin sa kampanya sa probinsya batok sa iligal nga pagmina. Ang operasyon gipahigayon ubos sa liderato ni Governor Darel Dexter T. Uy niadtong nilabay nga mga adlaw.
Sumala ni Engr. Alfonso Gorre Jr., nahibaw-an sa monitoring sa PEMO nga adunay grupo nga nagmina og bulawan nga walay permit ug migamit og cyanide sa pagproseso, diin ang hugaw nga basura diretsong gilabay sa suba ug hinungdan sa pagkamatay sa mga isda. Tungod niini, nakigtambayayong ang PEMO sa PNP, CIDG, Mines and Geosciences Bureau, Philippine Army, ug ubang ahensya aron ipatuman ang raid, nga nagresulta sa pagkasakmit sa daghang mining equipment ug 193 ka sako sa extracted materials.
Hapsay ug malinawon ang operasyon ug walay nasamdan. Ang probinsyal nga pangagamhanan nagpahimangno nga padayon ang hugot nga aksyon batok sa illegal mining, samtang gi-awhag ang mga komunidad nga mosunod sa balaod pinaagi sa pagkuha og ligal nga permit. Andam usab ang probinsya sa paghatag og alternatibong panginabuhian pinaagi sa mga livelihood ug livestock programs aron mapanalipdan ang kalikupan ug panginabuhian sa katawhan.(JENIFFER JR. DELICA)
Photo Courtesy: Zamboanga del Norte Provincial News Network