Nagpakita ug aktibong partisipasyon ang Zamboanga del Norte 2nd Provincial Mobile Force Company (ZN 2nd PMFC) sa Food Security Program for Peace and Development nga gipasiugdahan ni PBGEN Edwin Quilates, Regional Director sa PRO9, pinaagi sa pagtinabangay sa mga Grade 12 nga tinun-an sa Liloy National High School.
Ubos sa pagdumala ni PMAJ Bill Fernando P. Jumalon, OIC sa ZN 2nd PMFC, ang kapulisan ug mga Grade 12 immersants naghiusa sa hands-on activities sama sa pagtanom ug pag-atiman sa mga tanom aron mapalambo ang lokal nga food production. Ang kalihukan nagtumong sa pagpalig-on sa kalig-on sa pagkaon, pagpasiugda sa sustainability, ug paghatag ug kahigayunan sa kabatan-onan nga mahimong aktibong kaabag sa kalinaw ug kalamboan sa komunidad.
Gipakita sa proyekto nga ang kolaborasyon tali sa kapulisan ug kabatan-onan mahimo nga epektibo sa pagpalambo sa pagkaon, pagpalig-on sa resiliency sa komunidad, ug pag-andam sa mga batan-on isip mga lider sa umaabot. Pinaagi sa ilang partisipasyon, gilauman nga mas mosamot ang kahibalo ug kahanas sa kabatan-onan sa praktikal nga agrikultura ug civic engagement.(IKEN B. GULLEM)
Source: Zamboanga del Norte 2nd PMFC