Misidlak ang Museo Dipolog Grounds sa kahayag, musika, ug tingog sa masa human opisyal nga giablihan sa City Government of Dipolog ang PASADI 2025 o “Pasko sa Dipolog”, kaniadtong Disyembre 4, 2025.
Gidagsa sa katawhan ang lugar aron mosaksi sa usa ka malinawon, makalingaw, ug matahum nga seremonya nga nagtimaan sa pormal pagsugod sa Christmas celebration sa siyudad.
Mipaabot ang gabii ug festive performances, Christmas carols, ug mga presentasyon gikan sa lokal nga talento, samtang ang kahayag sa dekorasyon mitamol sa palibot. Ang kulminasyon sa okasyon mao ang bongga nga fireworks display nga misiga sa langit, nakapadasig sa mga bata ug hamtong, ug naghatag malipayong sinugdanan sa selebrasyon sa Pasko.
Gitambongan ang maong kalihukan nila, Mayor Roberto Y. Uy, kauban nila 2nd District Representative Airene G. Labadlabad, Governor Darel Dexter T. Uy, ug Dapitan City Mayor Evelyn T. Uy. Ubos sa ilang presensya ug suporta, nahimong mas mabungahon ang opening ceremony. Daghan usab nga opisyal, empleyado sa city government, barangay leaders, ug mga dinapit nga bisita ang mitambong.
Nagpakita ang PASADI 2025 ug mga highlight nga nagpasiugda sa tradisyon ug panaghiusa sa Dipolognons. Sulod sa sunod-sunod nga adlaw, gilauman ang daghang aktibidad sama sa Christmas shows, community events, booths, ug entertainment programs nga nagtumong sa pagpadasig sa komunidád ug paghatag ug kalipay sa tanang residente.
Pinaagi sa pagsugod sa PASADI 2025, gipakita sa Dipolog City ang ilang dakong pag-andam, kultura sa panaghiusa, ug kadasig sa pagdawat sa panahon sa Pasko uban ang katawhan.(IKEN B. GULLEM)
Photo courtesy: Dipolog City Government